【畀條路香港】和理非 鬥長命 牧師胡志偉：警隊不可能長期無法無天

「遊行嘅時候，啲人一叫林鄭，之後就係粗口。」胡志偉卻認為，似乎大家都意識到林鄭月娥只不過是一個政府的傀儡，大家都不期望她落台會帶來很大的改變，充其量帶來少許改變，及撫平市民一點怨氣。

他坦言，於政治層面，香港人能做的很有限。能做的是，先紓緩警民對立情況，他很想勸雙方都要克制，警察不應是情緒失控再找示威者出氣，以致濫捕及施行不必要的武力。

政府應「維護真理 拒絕謊言」

「我有次通宵喺警總外面，我哋有我哋嘅祈禱會，嗰時都有啲警察行過叫我哋曱甴。同樣喺警察總部出嚟都有唔同人等，對我哋有兩種截然不同嘅態度，所以我唔會睇警隊內全部都係壞人。我相信好重要嘅係，每一個人都企出嚟，表達我哋嘅聲音，就一定令到警察知道要適可而止。當我哋個個都噤若寒蟬 ，就會令警權更加無限擴大。」

「當然而家話要解散警隊只係一個口號，唔係一個切實可行嘅情況。所以我就覺得（要）重組警隊，而重組警隊之先一定要有獨立調查。香港市民，大部份，我相信對警隊已經冇任何信任。」他質疑林鄭的態度，對紓緩警民對立情況，有否幫助，「即係你（林鄭月娥）呢種假扮中立嘅言論，對受害者冇任何好處，反而覺得佢係俾隻大笨象隻腳踐踏緊。」

論這場社會運動的口號，大家便聯想起「五大訴求，缺一不可」；《願榮光歸香港》可謂家喻戶曉；「呀⋯⋯」之後，大家亦接得上去；而教牧於這場運動之中的一句口號，就是「維護真理，拒絕謊言」。

胡志偉解釋：「我哋而家確實睇得到警方，包括埋我哋政府入面一啲官員，經常以大話嚟冚住大話。比如呢段時間我哋睇到好多自殺個案，呢段時間我哋睇到好多浮屍，呢啲情況都係令到我哋一個正常人有合理懷疑⋯⋯所以點解我哋要去尋求真相，因為我了解咗個真相嘅時候，原來根本就冇任何被自殺，所有都係合情合理自殺，咁咪還警隊一個清白囉。」他認為於對立的情況，政府、警方仍堅持以立場先行，便是很大問題。

香港能置諸死地而後生

踏入10月，抗爭運動亦升級至出現不同形式的破壞，胡志偉承認，示威者的怒火，令他們做出過激的行動，認為他們有時候需要理性一點，但強調不是指摘示威者，亦不會與示威者割席。

最後，胡志偉希望，香港經歷一場風暴過後，整個社會得以重建，香港人未來將更重視和平、公義，多於物質，令這個城市彰顯仁義、彰顯慈愛，「我哋係能夠置諸死地而後生」。

記者：吳美茸、余曉芸

來源：按入